慘被警方「猴子偷桃」、獲釋後被擲雞蛋嘅學民思潮召集人黃之鋒，唔單止要同香港嘅強權、黑警角力，仲要同世界人物一決高下。將近年尾，2014年《時代》雜誌風雲人物候選名單上周公佈，並接受網民投票，截至昨晚截稿11時半，代表香港嘅黃之鋒已由上周的第11位，急升至第4位，網民噚日喺網上為被「偷桃」嘅之鋒催票，希望將之鋒谷上榜首。
「弗格森示威者」暫排第2
候選名單上一共有50人，截止投票時間係下月6日，投票結果下月8日公佈。黃之鋒係唯一港人代表，不過最終《時代》決定邊個係今年嘅風雲人物，網上投票只係其中一項考慮指標。風雲人物嘅寶座花落誰家，12月10日就會知道。早前《時代》選出全球25位最具影響力青少年，黃之鋒喺排名榜高踞第4名。原來之鋒當日被拘捕後落口供，當時連鞋都甩埋，被「偷桃」仲要唔見鞋，證明抗爭真係要付出好大代價。
今次投票由上周開始，之鋒一開始排名11，噚日排名大躍進，如今已躍升至第4位。現時排首位係今年當選為印度總理嘅反對派領袖莫迪（Narendra Modi），得票率約有一成，第2位是美國嘅「弗格森示威者」，佢哋不滿一名白人警員槍殺黑人青年，竟逃過被起訴，在美國多個城市爆發大型示威騷亂。
第3位就係早前喺20國集團被孤立而早走回國嘅俄羅斯總統普京，第4位就係之鋒，得票率更有5.2%。第5位就係諾貝爾和平獎得獎者馬拉拉。國家主席習近平排23位，得票率只有1.4%。想投票可到以下網站: http://www.ti.me/1vnkZvX
李八方
mailto:[email protected]