木薯資源（841）今日派半年度成績單，已經有盈喜打底，喺嚟緊日子，食住環保乙醇呢條水，業績應該會仲爆炸，博木薯破頂向上爆，諗得過。
木薯係泰國最大乾木薯片出口，同祖國最大乾木薯嘅進口商。之前主打木薯時曾經講過，阿爺規劃，環保乙醇目標產量，要由2010年200萬噸，大增到2020年時1,000萬噸。祖國環保國策，傾斜撐乙醇，作為生產乙醇嘅上家原料木薯，肥仔水。
阿爺推動環保乙醇
最新情況又點？先喺今年頭，等咗六年嘅海南椰島乙醇項目，終於獲批上馬，又尤其喺今年嘅下半年，阿爺開始加快環保乙醇項目，先有包括廣東第一個10萬噸燃料乙醇廠房獲批，兼已經開工，預計明年9月投產。
又包括天冠、中糧等等大孖沙，亦開始燃料乙醇項目。而啱啱喺個幾月前，龍力生物宣佈，攞到國家生物燃料乙醇政府嘅補貼，兼且係祖國第一個攞到呢個補貼企業。
乙醇廠過去幾年，正因為審批慢，阿爺所定嘅目標滯後，但睇到係，呢期阿爺除咗加快乙醇廠審批，兼開始發補貼，全力支持環保乙醇啟動，木薯一帆風順。
木薯上年盈利1.2億元，係最近五年嚟最省鏡嘅，但木薯現價（1.42元）比起2010年高位2.6元，講緊潛水45%。話前景停滯不前，木薯值配呢個低殘價，但有睇得到靚爆鏡前景，木薯現價就好明顯殘得唔多合理。
好保守估木薯今、明年度，只係keep住增長30%，明年純利上到近2億元，盈利可以keep住創新高，預測PE得4倍幾。木薯喺頂位橫行咗三個月，等破頂向上爆。買木薯博翻半番到2.1元，預測PE先得6倍幾。
錢雋
細價股專家
本欄逢周二、三、五刊出