被差人老屈襲警被拘捕嘅now新聞台工程人員李小龍，昨凌晨終於係無條件下獲釋，證明今次差人肯肯定係老屈記者，不過之前同樣老屈李小龍嘅立法會保安事務委員會主席葉國謙，竟然仲係度扭扭擰擰，唔肯正正式式認錯道歉，更加係踩到上心口，當記者好蝦！
死撐話自己表述不準
話說佢前日話睇網上流傳、冇剪接片段，見now新聞台工程人員用梯打人。咁𠵱家連差人都唔起訴，即係工程人員冇打人、葉國謙屈人打人就證據確鑿，稍有從政者道德都知，公開道歉、認錯、追究差人老屈新聞工作者，係最基本「消費」，點知佢噚日去港台節目，只係話如果now新聞台工程人員因為咁感到不舒服或唔公道，佢先願意道歉，仲死撐話自己只係表述不準確，可能用一啲比較合適嘅形容會比較好，講到尾，咪又係唔認有屈人！
最令八方㷫嘅係，葉國謙冇譴責、追究差人老屈新聞工作者，只係話警方應為採訪提供更多協助，輕輕帶過差人嘅錯失。原來係佢眼中，記者好蝦啲，可以未告就屈咗先算，屈錯冇件事；差人明明犯錯，就可以當冇件事，真係不愧為禮義廉資深議員！