上班服離不開白恤衫，平則可以100元有交易，也可以幾千元的名牌貨色。潘廸生千金潘楚穎（Dee Poon）五年前開始幫母親楊敏德經營PYE「派」賣恤衫，主攻中產市場，31歲的她年紀輕輕已搞得有聲有色，現已成為恤衫達人。
連開兩店
現任品牌首席執行董事和品牌總監的Dee Dee，哈佛大學哲學系畢業後，前年於金鐘開設首間PYE專門店，趁時機成熟，今個月中就在中環中建大廈一口氣開兩間分店，她日前接受訪問說：「今次真係好幸運搵到呢個舖位，一間賣嘅貨品比較casual同有lifestyle感覺，另一間就有訂製服務，走sophisticated路線。室內設計搵紐約建築公司Leong Leong負責，設計靈感來自中國傳統七巧板嘅靈活而變化多端概念。」
幹勁十足的Dee Dee滿腹大計，希望將恤衫變成更有創意和好玩的時裝，「做零售每年都要有拓展計劃，新店除咗恤衫，仲有賣家居服，又加入lifestyle元素，店內都有精品同書本發售，嚟緊會跟藝術家同設計師合作。」
做埋T恤
明年計劃更一籮籮，「明年初開始網上開店，𠵱家正喺美國物色店舖，希望明年可以拓展海外市場。下一步計劃做T恤，因為我好鍾意，市場上好難買到質地好又有剪裁嘅T恤，所以明年有好多projects，真係好忙，忙到每日瞓醒就check電郵，日日做到晚上10點先收工，雖然辛苦，但好開心好有成功感。」
Dee Dee謂恤衫已成為她每天的制服，更賣花讚花香：「我𠵱家日日着恤衫，乜嘢款式都有齊，爹哋媽咪都有捧場，最開心係之前荷李活男星奧雲韋遜（Owen Wilson）都嚟舖頭買恤衫，覺得好surprise！」
撰文：顏英儀