常被稱為「女神」、「BB」的劉心悠今年自組經理人公司做老闆，正式告別溫室小花的生活，她於新片《小姐誘心》同樣跟女神BB形象宣佈分手，與周柏豪談情說性，戲中二人有床戲又要制服誘惑，雖然心悠如此落力，不過柏豪在戲中卻觸及「男人最痛」—性障礙，令不少巴打心中慨嘆：「唔係嘛，咁嘥……」
撰文：文國駿
劉心悠及周柏豪日前為宣傳電影《小姐誘心》接受本報專訪，問到柏豪跟素有女神稱號的心悠合作有何感受？他謂：「認識佢好幾年，電影合作就第一次。我以前有儲佢啲相㗎，ICQ年代有朋友已經會傳佢啲相畀我，除咗NBA明星之外，女星我就只係儲心悠啲相。嗰時覺得佢好靚，入行後冇乜銀幕上嘅合作，都係活動，冇乜交流。今次拍戲真正認識佢，合作完仲加咗分！無添加零污染個感覺強烈咗，一嚟佢好專業，二嚟帶到歡樂去片場，言行舉止又幽默。」被柏豪大笠高帽的心悠則坦言起初以為柏豪「好Cool」，但原來是完全相反，她說：「佢好Easy Going。遇到呢個劇本，要大量溝通。今次同柏豪飾演夫妻，有我期待嘅火花。」
床戲唔使清場
二人在戲中飾演夫妻，親密之餘更有床戲，柏豪大讚心悠好「配合」，他表示：「我哋拍到最尾四分一先拍床上戲，大家會熟啲，成個過程好順利，我印象男女拍親密戲，女方一定好多要求，手放呢度又唔得，一Cut要眯埋眼同埋清場，但係心悠零要求，反而令我過程覺得幾舒服。」
心悠在戲中有一場為了令小柏豪「抬頭」而上演制服誘惑，她坦言很難忘：「嗰場好難忘，唔係尷尬，係要諗點演先引誘到老公，而唔係引誘全天下男人。」相比心悠的制服誘惑，柏豪反而覺得當街鬧交最難演，他說：「嗰場當街鬧交戲，唔可以死背要執生，現場又熱又多人，不過都冇乜NG，好好玩。」
了解男人最痛
戲中柏豪飾演性無能人夫，他笑言身邊沒有朋友給他參考，自己只是靠幻想演這種男人最痛的感覺，他說：「我身邊朋友冇人話有問題，惟有自己諗囉！不過今次拍戲，我了解咗好多我接觸唔到，但離我唔遠嘅事，好似結婚，我都30歲，雖然我未經歷過，但拍完好似真係同心悠結完婚咁。」
Make up：Kris Wong
Hair：Cliff Chan
Wardrobe：EVISU、XPX
