英皇集團老闆楊受成孻仔楊政龍（Alex）兩年前加入公司準備接班，𠵱家係英皇集團企業行政主任，英皇旗下西環維港峰年底開售，Alex噚日現身維港峰記者會，話要跟公司元老張炳強學賣樓。佢笑自己𠵱家喺公司乜都做，其實似打雜一名。
Alex今年27歲，喺美國波士頓大學修讀商科，兩年前加入英皇，相對而言，佢𠵱家應付傳媒提問或者簡單吹水，已經相當自如。噚日佢仲笑笑口咁話自己𠵱家有啲似打雜，因為公司業務裏面有地產、珠寶、金融，佢瓣瓣都有掂，淨係地產，佢都大把嘢學。
除咗部署12月賣嘅維港峰外，英皇旗下壽臣山豪宅項目同淺水灣商場The Pulse，佢都有參與，以後有大把機會見傳媒咁話。