有從事狗仔新聞嘅行家同關仁講，𠵱家追蹤嘅新聞就越嚟越難做係事實，佢舉個最近好熱門嘅例子，就係「MK仔」同「貴族」拍拖，喺屋企纏綿單新聞。佢哋話發掘單新聞都係有啲幸運成份，之後雖然搵到貴族個竇。不過佢哋兩個人好小心，永遠都唔會出街，一切起居飲食都係靠助手「老表」買。不過從老表搭電梯出入嘅樓層，由對面樓望過去，完全冇嗰對男女嘅蹤影。最後佢哋直情搵人跟老表入電梯，個謎底至解開。原來每次老表都會早幾層樓出電梯，好似貴族明明住15樓，老表就喺11樓出，再行4層樓梯運送食物。唔講以為做緊神偷諜影，做新聞好似拍特務片咁。
撰文：關仁