超級英雄電影氣勢如虹，當中Marvel每齣戲嘅主角唔係靚仔就係大隻佬，拍開超級英雄片好哋哋，幾個月前上咗套一班騎呢怪做主角嘅《銀河守護隊》，嘩，港產譯名有冇再老套啲？真係非戰之罪，因為英文片名就係好老套咁叫《Guardians of the Galaxy》，美國票房首周勁收九千四百萬美金，打破美國八月首周上畫最高票房紀錄，仲破埋《美國隊長2》成為今年美國票房一哥，呢隊騎呢雜牌軍，原來比一眾heros更受歡迎。龍叔叔最估唔到嘅，係電影原聲大碟《Awesome Mix Vol. 1》同期打上Billboard榜首，一碟十二曲，全部都係六七十年代經典金曲，聽到《Hooked On A Feeling》、《Come And Get Your Love》，龍叔叔不期然毛管戙，有股莫名感動湧上丹田，相信其他老鬼戲迷必定有feel。若無追開Marvel漫畫，好難明白點解同《復仇者聯盟》扯上關係。簡單講Avengers以守護地球為主，銀河就由Guardians of the Galaxy守護，中間就有共同敵人Thanos，據傳二○一七年上畫嘅續集，兩邊就會聯手出擊。
唔好講到二○一七年咁遠，講番今集隻BD先，電影以科幻喜劇作包裝，成套戲充滿大大小小嘅gag位，睇起上嚟比繃緊嘅超級英雄片輕鬆得多，而且角色鮮明，滑頭、呆笨、蠻牛等性格，撞埋一齊擦出唔少火花，似足《歡樂今宵》嘅諧趣劇，最出位係樹人Groot，由《狂野時速》光頭大隻佬雲迪素配音，成套戲只重複一句對白："I am Groot"，偏偏惹出不少笑位，雖然角色眾多，但時間有限，主要着墨喺主角嘅背景描寫，勝在情節鋪排尚算有序，由大家起初針鋒相對，到最後齊心滅敵，總算表達到應有嘅說服力。
聲畫無可挑剔
龍叔叔睇得最開懷嘅，係Marvel世界頂級CG特技，其中兩個主角樹人同火箭浣熊都係全CG塑造，唔單止激烈作戰時喺動作表現上無違和感，就連表情都似足真人，樹人不厭其煩介紹自己、寸寸貢嘅火箭浣熊又周圍辣火頭，總令人想起生活上的某某煩膠朋友，不期然想「煎」佢一巴。由於有IMAX加持，藍光碟喺聲畫上依然無可挑剔，好多大型戰役打到七彩，都唔會睇到頭暈。片商亦刻意為3D版加入唔少「激凸」鏡頭，明顯睇到場面嘅景深，比其他3D影碟更有誠意。
雖然片種走喜劇路線，少咗其他英雄片嘅肉緊感覺，不過一向討厭Marvel電影打打殺殺嘅女友，覺得呢兩粒鐘「輕輕鬆鬆鄧梓峰」，好過睇《復仇者聯盟》多多聲喎。科幻片都討到女性歡心，難怪票房咁勁喇。
龍叔叔簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
