周中阿仙奴對多蒙特，本身因為第二日有工作，所以想早啲瞓，但係都因為擔心阿仙奴會輸，所以最後都決定起身睇波支持兵工廠。諗唔到嘅係，耶耶辛洛高開波兩分鐘就先開紀錄，加上阿歷斯山齊士下半場嘅靚波，最後球隊以2:0贏出，我呢個廠迷當然安心晒，可以瞓番覺好嘅！
呢場歐聯大戰開波前，就有人做過調查，指有9成球迷都想雲格（圖）下台，應該同球隊連續輸畀史雲斯同曼聯有關。而咁啱球迷最想接雲格棒嘅，就係多蒙特嘅緊張大師教練高路普。不過相信連廠迷都諗唔到，最終贏波嘅唔係大家都欣賞嘅高路普，而係為阿仙奴賣命咗咁多年嘅雲格。我都知道呢場勝利，可能只夠球迷對雲格嘅不滿降一降溫，只要阿仙奴又輸波，又會有人衝出嚟叫佢下台。其實足球就係咁現實，一切都以成績行先。如果你問我，我當然想雲格繼續教落去，試問𠵱家球壇點會搵到有個好似佢咁，咁有腰骨嘅好教練呢？
雖然大家覺得教授成日得一套戰術，但我就係like佢嘅堅持，堅持要打地面足球，唔會怕輸而擺巴士喺門口，亦唔似摩連奴講一套做一套！而且雲格一心幫球會保持盈利，唔會盲目買人，近兩季有多啲資金，就即時贏得兩項錦標，今季亦激活到韋碧克。
要得到更多球迷歡心，今個星期作客西布朗就要贏得好好睇睇。始終要用「後後備門將」，所以未必可以唔失波，贏3:1就啱數啦！
LULU
不懂踢波愛睇波