喺香港體育界，今日有件唔大唔細嘅事發生，有位好受歡迎嘅體育主播將離開三色台，佢今晚會最後一次喺11點新聞出現。佢前幾日寫咗篇離職心聲，佢有句引述已故體育主播伍晃榮先生嘅說話，令小弟好深刻，「未能把體育帶到更受人關注的層面，是我們的過失。」
食體育呢行飯，都好感慨，比起其他範疇，重要性同受關注度都較低，就好似上本報即時新聞網站，喺分類入面，要聞、突發、娛樂當然行先，體育就排尾3，小弟成日上外國新聞網站，好似英國《每日郵報》，喺頂嘅分類入面，第3就係體育。以前成日都會怨，點解香港人咁唔鍾意體育，但𠵱家諗諗吓，自己都可能有責任。
講開過失同負責任，呢個星期聽到最多係兩個名，就係雲格同羅渣士（圖右）。先講雲格，佢面對嘅困境係點樣改變思維，之前阿仙奴財政緊絀，佢含辛茹苦咁年年幫球隊保住前4名，功不可沒，但𠵱家阿仙奴嘅財政越嚟越健康，球迷同球會對成績嘅期望都會變高。究竟雲格可唔可以改變風格，由爭4模式變番做爭冠呢？
至於羅渣士嘅困境係博輸咗，喺蘇亞雷斯離隊後，佢可以改革戰術，或者沿用上季戰術，但要搵人頂阿蘇個位，佢揀咗後者，諗住用史杜列治做阿蘇嘅角色，點知史杜長期受傷。羅渣士目前有兩條路，搵一套啱拉爾拉拿同列基林拔發揮嘅戰術，或坐喺度等史杜復出。
文：咖喱