雖然內地散戶熱衷炒細市值嘅創業板股，但市值高嘅滬股通名單股份，一樣可以升得好誇張。噚日市值近300億元（人民幣．下同）嘅中國一重（601106）就升停板，今年股價翻咗一倍，市盈率去到1,723倍天咁高。
戰友要喺A股搵食，恐怕要學習同胞呢種視基本因素、估值於無物嘅境界。
咪以為中國一重係隻高增長股份，公司去年收入84億元，只增長0.6%，純利只有1,700萬元，仲要按年倒退41%。擺到明就係一隻表現平平嘅國企工業股。可以升成咁，無非係炒概念，而且唔係一種概念，幾乎近期A股最熱門概念，瓣瓣佢都有份，仲不升爆？
中國一重業務包括核電、機械、化工設備，近日核電概念係當紅炸子雞，佢先中一瓣；另外，A股開始炒所謂工業4.0嘅智能機械，都叫關佢事。內地搞空氣污染治理，公司有生產加氫脫硫設備，算係受惠環保概念。
有三大光環加持，過千倍市盈率只係濕濕碎啦。中國一重例子話畀人知，炒A股最重要係睇概念，其他只是閒事。而且唔係睇一種概念，瓣數越多，越容易炒上。
李可強