伊巴謙莫域話晒係球壇呂布，佢喺同佢踢過同一間球會嘅前隊友裏面，揀選自己嘅夢幻11人陣容，仲每人畀個外號。伊巴揀人時淨係會睇係咪同佢一樣咁勁，唔理同佢有冇私人恩怨，所以就算好睇美斯唔順眼，都照揀可也，不過佢只係叫美斯做「天才」兼拎走佢件10號波衫畀自己，自己就稱做「神」，點都唔肯輸畀美斯。
由之前嘅阿積士、祖雲達斯、國際米蘭、巴塞隆拿同AC米蘭，到家陣嘅巴黎聖日耳門（PSG），現年33歲嘅瑞典國腳前鋒伊巴，踢親都係大球會。日前佢就喺呢班前度同現時隊友之中，嚴選自己嘅夢幻11人。
家陣佢踢緊PSG，佢亦好識做，將隊友麥士維同堤亞高施華列入佢嘅夢幻陣容。麥士維之前同佢一齊踢過阿積士、國米同巴塞，同伊巴非常有緣，呢個亦可能係伊巴揀佢嘅原因。至於堤亞高施華，假假哋佢都係PSG隊長，伊巴點都要畀少少面。
巴塞3子都有份
係人都知伊巴喺巴塞踢得最唔開心，仲鬧過美斯、恩尼斯達同埋沙維係小學雞，淨係識得聽當時教練哥迪奧拿命令，完全唔識反抗。但唔妥還唔妥，佢始終非常認同呢3位巴塞球員嘅實力，所以都有揀佢哋，而且仲安排自己同美斯踢雙箭頭㖭。但被認為係英超史上其中一個最偉大前鋒嘅亨利，雖則同伊巴做過1季巴塞隊友，但喺佢心目中，亨利未係嗰個陣嘅級數，所以梗係冇碇企啦。
騎住天才着埋10號
另外，祖雲達斯應該係伊巴踢得最開心嘅球會，如果唔係「電話門事件」而搞到降班，佢未必會喺06年夏天離隊。嗰陣時喺老婦人同佢合作過嘅巨星級球員保方、杜林、簡拿華路、韋拉同尼維特，全部都有入選。值得一提嘅係，入選佢夢幻陣容嘅全部11位球員，包括佢自己，全部都有個花名，佢叫美斯做「天才」，但就叫自己做「神」兼着10號波衫，好明顯，佢覺得自己點都係勁過美斯。
識睇，一定係睇足英台【英波Live】：
http://soccer.appledaily.com
http://bit.ly/engballlive