東亞銀行（023）旗下專業服務公司卓佳，噚日舉行一年一度研討會，主題係討論點樣推進企業可持續發展。作為大老闆嘅東亞銀行主席李國寶一如既往，鼎力支持，做會議開場白嘅演講嘉賓。
李國寶話，家陣監管機構對上市公司有更多標準要求，包括環境保護、社會責任各方面，希望令企業有持續發展。企業現時唔可以好似以前咁，只係單單睇企業本身嘅需要，仲要顧及環境同社會因素，甚至成為企業DNA嘅一部份。
講到社會因素，大家當然想知佢對於雨傘運動有乜意見喇，點知佢講完個speech，就嗱嗱聲鬆人，公關大員用最老套嘅理由幫老闆擋駕，咪就係話李國寶趕住要開會囉。不過李國寶逐步交棒畀兩位公子，確係少咗公開議事論事了。