Prof J剛啱喺上星期六、日，出席國際房地產及財經博覽會（Smart Expo），同場仲有老友、房地產猛人姚浩然。喺嗰日，我有提過魔術股──香港電視（1137），我好信任「王魔術師」，佢真係好似米奇老鼠咁隨時將最美麗嘅煙花點起！等睇戲！
圓滙跌 遊日人數增
Prof J又要做空中飛人，本文見報之日，身在北京，主要同內地投資者講港股通，朋友成日話我唔得閒休息，我平日喺6點幾起身，會即刻返公司做研究、見客，返到屋企仍會繼續做研究，有老友問我最近蜻蜓投資法有無捉到新股？我就同佢講，可以留意吓快上市嘅東瀛遊（6882）。
如果有朋友經常去日本旅行的話，都會知道東瀛遊係香港旅行團市場嘅領導者之一，而客戶人數同收入亦不停咁升，公司又無負債，呢幾年按年增長都有兩成幾近三成，再加上呢一排日圓滙率下跌，刺激本地人旅遊日本嘅意欲，報名人數有望繼續創新高，於是幾忙都走咗去同禤老闆見面！
東瀛遊表示，旅遊業嘅競爭越嚟越大，東瀛遊為咗尋找更優質、價格更便宜嘅機票、酒店房間、交通運輸，公司會透過招股上升擬集資1.8億元，當中接近三成用喺開發配備綜合網上預訂及企業資源計劃系統，改善資訊管理，提升盈利能力。
徐燦傑
齊魯國際控股首席策略總監
本欄逢周四刊出