恒隆地產（101）大老闆陳啟宗媽媽，即係「陳老太」陳譚慶芬本周二買入恒隆旗下位於九龍站嘅君臨天下第一座頂層單位，特別嘅係，陳啟宗早於10年前已經喺同一層買入一個複式單位，聽聞佢有時真係會喺呢度住，𠵱家陳老太買入隔籬嘅單位，有需要時可以方便照應喇。
根據恒隆發出嘅通告，陳老太以9,941萬元買入君臨天下第一座77同78樓一個複式單位，加埋兩個車位。其實陳啟宗早於2004年恒隆推售君臨天下冇耐，就以3,700萬元買入同一層另一個複式單位，連老闆自己都買番個，就知佢幾咁睇好呢個樓盤。𠵱家陳老太買入嘅單位都要近1億元，陳啟宗嗰個係向海單位，應該更貴。以地段同質素而言，君臨天下確係豪宅，陳老太買入保值確係不足為奇。