叫特首梁振英考慮辭職結果「被辭職」冇得做全國政協委員嘅自由黨田北俊近期人氣爆登，自由黨青年團噚日嘅Social Wednesday就請咗田少做嘉賓，吸引近百人出席，田少風騷滿場飛，心情十分好。自言做慣老闆唔慣做夥計服侍人而冇諗過選特首嘅田少，被台下問到如果下屆得梁振英同新民黨葉劉淑儀咁點揀﹖田少支咪此時突然失靈冇咗聲，畀足時間佢思考點回應後，田冇正面點評二人，只話如果中央畀香港人普選，相信一定畀個香港人揀得落手嘅。
連日來警方喺旺角驅趕佔領人士，警棍橫飛，田少雖然反佔中，但覺得佔中對經濟嘅影響好快就會復原，仲話：「其實我唔係好清楚旺角發生乜事。」