毛里裘斯籍騎師田泰安今季黑到冇朋友，同一隻馬由佢跑極都輸，一換人就即刻贏，之前例子已經有唔少，呢晚第三場四班1200米再嚟一隻「大將風馳」。此匹苗廐馬開季由田泰安於田草連輸兩場後，呢鋪跑番唯一贏過之谷草1200米，配搭換上李寶利，落番四班跑加埋打王牌，結果由蟲變龍，後上衝贏靚媽曾向欣之愛駒新勝馬「悅欣賞」，爆出20倍冷W。「悅欣賞」跨季近四戰保持此程全入Q，拎到兩冠兩亞，今場跑第三係郭能新接手之「蜜圈」。
意大利好手李寶利重臨客串未夠兩個禮拜，已經喺谷草同田草各贏咗一W，當中「大將風馳」馬主大將之家團體 成員包括王賢誌，乃其家族「大將」系多駒中，今季首次奪勝，而苗禮德亦繼「龍城勇將」之後，連續第二個賽日爆冷贏馬。
王賢誌拉完頭馬後，還留在凱旋門一會玩自拍，十分興奮。他表示賽前信心一般，只投注了少許，他指馬兒很喜歡跑谷草，加上狀態好弗，又幸運地今仗步速利後追，一切很夾很有運。並指升上三班仍有一定機會。