苗禮德馬房的前馬王「雄心威龍」，曾經因為傷患，久休足足1年半，加上今季屆8歲高齡，好多馬迷都覺得佢已經廢咗大半武功，但此駒上月26號復出跑1600米沙田錦標，初配47歲老將巫斯義，居然令人驚喜，直路有心有力追過好多對手，只輸畀頭馬「軍事出擊」四份三身位得季軍，馬王即係馬王，明顯退化程度比想像中少。
到了本月23號，「雄心威龍」再出，爭馬會一哩錦標，結果又係得季軍，雖然對頭馬「步步友」無威脅，但距亞軍「大運財」只係短距離。據知賽後苗禮德對巫斯義唔多滿意，認為佢冇盡早移出，令「雄心威龍」全程焗喺內欄競跑，展步唔太順，未能沿用以往贏馬走大外檔發力衝刺戰略。苗禮德經過詳細考慮，決定飛起巫斯義，「雄心威龍」下月出戰香港一哩錦標，將配英國騎師莫雅，希望趁隻馬回勇，得到最佳發揮。
講到莫雅，喺好多馬迷心目中，乃天下第一高手，佢係三屆英國冠軍騎師，曾喺2009及2010年成為香國際騎師錦標賽總冠軍，單係今年已贏出15場一級賽，事業處於巔峰。而「雄心威龍」歴來常惹是非，2012年5月配韋達跑冠軍一哩賽梗頸四，苗禮德賽後炮轟韋達唔聽佢策騎指示，私自走內檔令馬兒落敗，之後至今兩年半，兩人只合作過「風雷」一次。而上季初潘頓為了揀「軍事出擊」，公開宣佈放棄「雄心威龍」帥權，亦惹來老苗不滿。