內地人好多都鐘意睇樂視網，但係呢隻深圳創業板龍頭股今年卻頻頻出事。先有傳言話，中央會吊銷佢嘅互聯網牌照，跟住就話樂視大老闆，山西煤老闆出身嘅賈躍亭，就嚟被公安拉。
最得人驚嘅就係，過去半年賈躍亭真係一直都唔敢返大陸，話就話喺香港醫病，俾人覺得就係着草。公司10月停牌至今，股價今年插水自不在話下。
賈躍亭終於喺前日蒲頭，發微博話已經番咗北京，意味可能已經同公安與紀委拆掂，佢可能逃過一劫。
內地傳媒好快披露，樂視網早期有位大股東今完成，係已經被拉咗山西政協副主席令計畫弟弟，不過已經喺2012年退出。但公司會唔會受累就冇人知。
樂視網單嘢，有少少似之前因前政法委書記周永康落馬而受牽連嘅惠生工程（2236），主席華邦嵩喺上市前，靠不正當手段取得石油工程合同，而家被拉咗，股價大插。
但最無辜嘅就係股民，因為冇可能事先知道大股東喺上市前搞嘅政治瓜葛，一旦政治炸彈爆炸，就要齊齊攬炒。
要炒呢類中資股或A股，惟有打醒十二份精神。
李可強