內房企業又多一位女老總了。一講由女性擔任老闆或者大股東嘅內房股，來來去去都係龍湖地產（960）董事長吳亞軍、SOHO中國（410）老闆娘張欣，同埋花樣年（1777）大股東曾寶寶，以後將會多一位華遠地產嘅孫秋艷嘞。
華遠地產最出名就係有一位有「任大炮」之稱嘅前董事長任志強，佢經常透過微博講東講西，言論惹火，上月底佢就喺微博證實本月退休，華遠董事會本周一開會就選出孫秋艷做佢繼任人。
52歲嘅孫秋艷外表娟好，之前極少喺傳媒曝光，原來佢屬元老級人馬，1987年已經加入華遠，至今工作咗27年，佢2002年升任副董事長兼總經理。近年任志強專注公益事業，公司好多事已經由佢處理。可惜華遠唔係上市公司，大家應該未有機會在港見呢位靚老總。