立法會辯論政治議題，甚少可以令到泛民、建制派有一致意見，不過呢樣嘢被公民黨湯家驊打破咗，佢提出動議叫港府盡快交出「切實可行」嘅政改方案，最後獲兩邊大比數贊成，譚志源心情好靚，仲同八方大講佢睇港視《選戰》心得。
譚志源身為政制及內地事務局局長，佢同八方講佢都有睇《選戰》，仲話初時覺得主角葉晴似葉劉，但越睇越唔覺，仲話留意到劇中嘅2022年特首選舉，入面仲有提委會提名，即係話符合《基本法》﹗至於有冇角色似佢呢？佢幽自己一默話：「有冇個髮型係我咁上下嘅？哈哈哈！」
講番個動議，雖然總算皆大歡喜收場，但其實泛民、建制只係各取所需：建制派當然話政改要跟《基本法》同埋人大落三閘決定，泛民亦不甘示弱，不厭其煩解釋真普選嘅重要性，人大應該撤回落閘決定外，亦炮轟前日警方旺角暴力清場，而譚志源讚湯少一直堅持跟《基本法》同埋尊重法庭維護法治，令佢都要向湯少致敬意。不過致敬又如何，湯少提出跟《基本法》嘅方案又如何？北京咪照樣落閘。