周末即將舉行台灣九合一選舉，本港多個政黨組團過去觀戰，好似公民黨、工黨同民主黨嘅「觀戰團」就今日赴台，主要去國民黨、民進黨嘅選舉總部，無黨籍台北市長候選人柯文哲係另一觀摩對象。有泛民中人私下講，今次去台灣除咗睇選戰，仲想睇吓中共搞香港，點樣連累「友好」國民黨大敗、睇吓習近平點搞散成個對台政策。
話說香港爆發雨傘運動，「今日香港、明日台灣」已成台灣年輕一代想法，更令自反服貿以來，國民黨有投共賣台想法，更令台灣人相信。
Tanya參考「首投族」攻勢
所以有泛民成員同八方講，今次去台灣，一定會「客觀」向台灣人介紹香港情況，順手睇埋國民黨點樣俾中共搞香港累死埋，包括輸埋連勝文出選嘅台北市市長位，「習近平咪成日以為用經濟可以搞掂台灣、香港再冇示範作用？如果今次國民黨大敗，連老巢台北市都輸埋，正好話畀中共聽，佢搞死香港，連台灣都會冇埋，除非佢武力攻台！」
而泛民幾個議員同八方講，今次民主、公民、工黨去觀戰，主題仍係觀察選情，工黨何秀蘭就話，大選在即，相信對方都唔得閒接見佢哋，都係做吓塘邊鶴睇吓有乜嘢選舉策略可以套用喺明年同後年嘅區議會、立法會選舉。公民黨嘅團長、副主席陳淑莊（Tanya）同八方講，佢哋會去台北、台中參觀競選辦，香港雨傘運動由年輕人擔大旗，Tanya話今次台灣選舉「首投族」（首次投票者）係關鍵，所以佢最想了解各候選人針對「首投族」嘅攻勢、文宣，同埋各黨如何整合資源運用等。
李八方
mailto:[email protected]