唔少警隊高層退休後，都俾大企業挖去做顧問，今勻就係藝人任達華嘅阿哥任達榮，佢係前警務處副處長，2010年退休後，翌年加入恒和珠寶（513），今年3月仲升任執行董事。齋睇公司名，自然以為呢間公司賣珠寶，查實佢哋正努力轉型發展地產項目。
任達榮噚日出席恒和珠寶在港首個地產項目嘅發佈會，佢話自己專注公司業務發展同礦務部份，查實咪又關地產事。
雖然佢自認做地產嘅時間唔算長，但話晒當年陀槍都做到管理層，做嘢當然絕不馬虎，被問到樓市動向，佢都答得有紋有路㗎，尤其係講到商舖市場，佢話近期舖位租金已經見頂，零售市場亦出現短暫影響，但長遠而言，香港零售市場同埋舖位始終向好。佢又話，公司𠵱家趁機搵緊一啲投資機會，同埋搵合適嘅地方發展。