曾幾何時聽過一個爛Gag，問題係：「星期日邊度最多菲傭？」答案當然係菲律賓，不過好多香港人都會被fake，答「中環」。咁唔怪得大家，香港有成30幾萬外傭。話多唔多，但如果佔人口3%嘅外傭，全部都係你嘅客，都已經好和味。上市公司入面，靄華押業（1319）就係其中一間擺明車馬做外傭生意，上年招股時更話外傭佔貸款比重近三成。
除咗傳統行業睇重呢個市場，亦有startup吼實外傭機遇。比特幣交易平台Bitspark，之前於菲傭蒲點——中環環球大廈設攤位，幫佢哋將錢兌做比特幣，再滙返家鄉。大家都知，比特幣滙率上落大，所以Bitspark會事前同客仔傾好滙率。至於Bitspark最吸引之處，就係抵！收佣少過1%，比傳統銀行約3.5%更低。
比特幣熱潮雖已退，不過以目前科網發展速度，相信比特幣點都會搵到佢嘅生存空間。電子貨幣雖未普及，不過電子錢包就已大行其道。10月底曾有過一段升浪嘅志道國際（1220），最近收購一間網絡支付公司，生產MISC晶片，可用於身份證、支付卡等。唔少公司都需要網絡支付系統，而呢一年中外各地咁重視網絡安全，志道嘅晶片獲國家級認可嘅安全技術，絕對係市場所需。近日震一震後重上1.5元左右水平，可低吸博完成調整。
Fifi
http://www.facebook.com/lovefrystock
本欄逢周二、四刊出