天王郭富城上季起勢拉頭馬，今季則運氣逆轉，合夥馬「愛將」腳傷出局，個人名下馬「愛的呼喚」亦逢出例輸，包括呢晚第六場三班1200米，換潘頓繼續無功而回。為咗幫愛駒加油，城城今場拉埋老友丁子高、楊千嬅、陳小春、應采兒、經理人小美、警隊前一哥鄧竟成等人打氣造勢，點知佢哋努力呼喚，都見唔到「愛的呼喚」殺出重圍，隻馬直路喺外欄衝咗一陣就腳軟，3.7倍次熱門三甲不入只得第五，搞到大家冇晒癮。
反觀呢晚大熱門就好旺場，上半場只係得第三場「保羅威威」唔上名，其餘全部Win晒，到下半場先係「萬眾期待」勝出，跟手第六場黎海榮座騎「精算率然」亦大熱掄元，四歲馬首勝三班，季內三戰兩贏一位，絕對係大熟開竅之表現。二、三名分別由「信眼光」同「香港神駒」拎到，三千幾萬巨額三T最終有3.8注中正獎，每十蚊注派彩1,030幾萬，中咗即刻可以榮升千萬富翁。
「精算率然」馬主龐維寧表示，韋達很喜歡此馬，但由於造不到磅，故易配黎海榮，榮仔今仗發揮值得一讚，至於下仗帥權交給哪一位仍未知道，無論用韋達很、黎海榮都理想。