十一月二十一日星期五嘅午飯局上，有經常出入澳門賭場嘅炒家X，一路食飯一路講電話，原來有幾位朋友搵佢撲澳門酒店房，住星期六一晚咁多啫，炒家X話：「今個禮拜五禮拜六，澳門酒店一房難求，我都冇符，唯有一一推晒。」點解澳門咁巴閉，大賽車餘威猶在？啲遊客車手應該走晒啦，炒家X話：「左丁山你少過澳門，有所不知，現在澳門方是盛事之都，香港唔係，世界級表演及巨星演唱會，盡在澳門舉行。今個星期日早上有拳賽，由最有叫座力嘅菲律賓拳王帕奎奧（Pacquiao）出場，門票一早沽清，個個星期六晚上到澳門，要搵房住一晚呀。」
乜打拳唔係在晚上舉行嘅咩？星期日大清早就打擂台，大家瞓醒未呀？又俾炒家X教訓一輪：「打拳係大生意呀大佬，星期日澳門早上係美國東岸時間星期六晚上，拉斯維加斯時間嘅黃昏，正是美國收費電視Pay-Per-View嘅黃金時間，現場票價雖然收得咁貴，我張一萬八千元門票只係坐到第十行以外，但門券收入絕對難與電視收入相比。如果唔係咁多人睇電視，帕奎奧點會打呢場拳賽收二千四百萬美元！」
呢點左丁山又知噃，因為「紐約時報」係咁樣講嘅，仲話明帕奎奧可能仲會收到「花紅」六百萬美元㖭（要視乎電視收益而定），打一場收三千萬美元相當於全港菲傭（如有二十萬人，四千蚊一個月）月薪嘅30%，數量相當驚人。呢場拳已經順利打完，大明星史泰龍與阿諾史華辛力加係現場第一行觀眾，35歲嘅帕奎奧結果大熱取勝，即刻向美國welterweight（147磅）拳王Mayweather挑戰，話後者不能再左閃右避，係唔肯接受挑戰嘞！如果呢場拳賽舉辦得成，帕奎奧收五千萬美元閒閒地。當日亦有中國拳王鄒市明力戰，打贏泰國坤比哲獲得勝利，但左眼亦被打到腫如雞蛋。鄒市明係中國之希望，亦係拳賽組織之吸金希望，經理人安排咗帕奎奧教練做佢嘅教練，非常重視，原因好簡單喎，鄒市明名震中國，有佢出場嘅話，隨時可以有三億中國收費電視觀眾，故此世界拳賽組織、賭場、經理人公司好希望鄒市明成為帕奎奧之亞洲接班人。香港曹星如呢？係好嘢呀，在星期日賽拳取得15連勝，但因為佢係香港人，在中國市場之吸金能力難與鄒市明相比咯，但成為香港之光，應無難度。