前新聞王子柳俊江轉眼也離開無綫5年，他昨表示支持好友伍家謙離職決定，柳爺昨受訪時說：「只要唔好太在意喺新聞部入面嘅包袱、框框同形象，出面世界同新聞部好唔同，我相信觀眾好想睇新一面嘅伍家謙。」他又讚伍家謙是搶手貨：「以前喺電視台以為好犀利，出到外面世界係好大，可以同唔同傳媒同機構合作，我相信佢好渴市，佢會有後着，唔使擔心。」柳爺指主播晚晚出鏡讀新聞，月薪最高約三萬，收入視乎出鏡頻率。
問到可覺伍家謙離職與聯署事件有關？柳爺說：「佢一路都想離開，我冇八卦佢係咪因呢件事催化離職。近年體育時段唔受重視，新聞時段得兩、三分鐘，觀眾都到喉唔到肺，裏面做嘅人與其唔重視，不如自己另搵新路，唔需要屈就喺咁嘅地方。」可覺電視台將來人才流失更多？柳爺說：「電視台態度由頭到尾係冇話冇邊個唔得，我當年都係心淡先走，新聞部方式好困住同管束員工，令人好壓抑。」
採訪：比華利
攝影：仇志中