係人都知飲汽水唔健康，𠵱家美國人都越嚟越少飲可口可樂，銷情唔好，可口可樂都要「從良」，繼早排收購能量飲品生產商Monster Beverage，𠵱家仲打算賣埋牛奶。
可口可樂計劃下月喺美國推出牛奶品牌Fairlife，新產品會較一般牛奶售價貴一倍，有乜咁巴閉？公司話呢隻奶低糖兼高蛋白質，糖減少30%，蛋白質多50%，全無乳糖，優質又好味喎。
過去10年，美國嘅牛奶銷售減8%，因美國人開始轉食乳酪等高蛋白質嘅低糖產品，可口可樂就係睇中呢個趨勢，推新產品。
一講可樂，華華自然諗起財庫局局長陳家強同埋太古A（019）主席史樂山，事關陳家強食親飯都要有罐可樂，史樂山就鍾意拎住可樂見傳媒，唔知兩位有冇興趣試下可口可樂牛奶呢？