今季贏過馬嘅女馬主有唔少，有李嘉欣嘅「貳寶」、郭詩慧嘅「綻放美麗」、蘇凱欣嘅「同個夢想」及曾向欣嘅「悅欣賞」等。其中「綻放美麗」同「悅欣賞」將會喺今期谷草夜馬再出，兩隻都係當勇份子，不過今次排位就命運各異喇，角逐一哩賽嘅「綻放美麗」抽正最外嘅12檔衰位，話冇影響就呃你嘅。相反「悅欣賞」行好運，跑1200米排一檔起步，啱晒呢匹快放馬發揮。
曾向欣早排再做媽媽，誕下小千金，呢排湊女湊到好忙，佢最鍾意同BB女一齊玩自拍，記錄溫馨時刻，一家四口幸福滿瀉。欣欣話好錫一對乖女外，亦當「悅欣賞」如珠如寶般，上月底愛駒贏馬，佢就有入場打氣兼拉頭馬。
欣欣透露大女叫蘇悅，所以愛駒就命名「悅欣賞」，希望隻馬各方面都出色，好似囡囡咁值得大家欣賞。睇番「悅欣賞」，今季表現的確人見人讚，跑兩場一冠一亞，欣欣話練馬師沈集成照顧得隻馬好好，狀態保持大勇，騎師蔡明紹亦鬥志十足騎功好，加上愛駒今仗抽一檔，有一定信心再贏喎！