滬港通唔掂，港股上周就沽到反艇，跟住上周五中央即刻嚟招減息頂住個市，話就話要舒緩融資難，不過都難咗好耐啦，又會咁啱喺滬港通頂唔住個市先嚟減息？你話貨幣政策涉唔涉及資本市場操作呢？呢個真係留番畀閣下自行判斷。更重要嘅係，中央趁呢個時候減息，適逢月尾係部份對沖基金年結，踏入12月又例牌轉靜，減息迎收爐，的確可以增添些少維穩作用。
上周五人行雖減息，係兩年幾以嚟首次，亦係貨幣政策轉向嘅象徵，仲要係突如其來，市場點都應該要有強烈反應，但港股周一裂口高開，收市升2%左右，噚日已經變軟皮蛇，部份二三線股直頭係沽得狠，唔少股仲衰過人行宣佈減息之前。之但係，內地A股噚日表現就唔差，全日升1.4%。原因之一就係港股通反應遠遜滬股通嘅因素，仲未完全消除，所以減息好消息消化咗一日後，兩地股市就照舊行番A股強、港股弱走勢。
即使中央減息維穩股市，周一港股價量齊升，主板成交有成1,052億元，但係綜合近年港股慣例，單日千億成交後，買盤就一下子消耗盡，之後恒指通常冇好日子過，分分鐘就係千億成交當日就見頂。
小注買和記港陸
另外，睇埋美股道指，9日RSI喺周一升到接近85嘅嚴重超買水平，根據近年慣例，指數就算唔跌，點都要橫行兩、三個星期，就咁睇嚟，美股因素短期內幫唔到港股翻身。
所以，喺年尾前，港股利好因素欠奉之下，好難明顯上升。升唔起，跌未必跌得多，就變咗得個chok字，年尾前玩二三線股，如果見高追，見唔對路又沽，可能十條命都唔夠輸，暫時策略上只能逢低吸，見高即沽。
年尾流流，見到咁嘅形勢，或者大家會寧願多一事不如少一事，提早收爐算數，不過，只要港股冇出現拋售情況，又未至於冇嘢炒，至少細價股市場應該依舊暢旺，皆因大陸錢唔慣年尾收爐，佢哋有得賭點會唔賭？
細價股裏面，可以留意吓和記港陸（715），最近李嘉誠將呢個殼賣咗畀內地泛海控股，後者以作價38億元買入71.36%權益，每股全購價0.5973元，現價只高14%左右。話晒泛海控股係內地知名綜合企業，能夠喺誠哥手上買殼，當然來頭不少，斷估小注買嚟跟住泛海控股坐貨都冇乜錯，唔排除年底前就已經炒番轉。
晉佳
http://www.facebook.com/pages/晉佳/719009541518415
本欄逢周三刊登