曾做唐唐競選辦副秘書長嘅華人置業主席兼行政總裁劉鳴煒，最近又開始活躍，噚日連踩兩場，不過佢就同自由黨田少一樣，撐政府之餘，亦不忘暗寸狼英作風。
叫畀空間年輕人追夢
劉鳴煒噚日上晝先去智經記者會，仲賣花讚花香話佢哋份研究香港青年流動性報告，係「市面上最深入、最認真」嘅報告，強調智經早喺去年暑假，已知要正視有關問題，絕對唔係忽然關心，擺明暗寸佔領之後，至頻頻開會傾青年問題嘅狼英。
對於狼英政府有高官提出騎呢建議，話要搞「青年舞會」畀青年宣洩精力，劉鳴煒聽到都忍唔住笑，話份報告着眼長遠政策，至於搞舞會，佢真係未聽過，又話自己唔跳舞，劉鳴煒又話，即使政府搞好經濟、就業同房屋問題，香港青年仍會表達對真普選嘅意見，立場擺明同狼英唔同。
劉鳴煒下晝現身佢發起嘅香港精神大使委任禮。被問到狼英話香港青年要人「𠱁」，劉鳴煒一面話不便評論政府政策，一面笑笑口話實情港青同外國青年差唔多，係有好多夢想，香港應該畀足夠同充份嘅空間年輕人達成夢想，似乎都唔多buy狼英嗰套啦！