噚日A股炒得最勁嘅係上海股，《上海證券報》、《中國證券報》不約而同發表報道唱好迪士尼，話記者感受到工地熱火朝天嘅景況，一定會帶旺上海。
喺有心人造勢下，噚日上海股隻隻都大升，總之無論基建、消費、地產，都可以搵到題材炒一番。
據內地媒體報道，上海迪士尼將明年底開幕，每年遊客將有2,500萬，屆時一定會爆棚。
最搞笑係，報道引述香港迪士尼概念股經驗，話可以炒足五年，由2003炒到2008年長升長有，例子就包括莎莎（178）、佐丹奴（709）、周生生（116）等。其實係香港人都知，前幾年消費股有運行，係受惠自由行，根本唔關迪士尼事。
以為當年香港迪士尼真係有咁勁，可以帶旺成個市，咁就肯定係表錯情。
不過，市場炒作只需要藉口，當年圍繞香港迪士尼嘅恩恩怨怨，內地股民恐怕亦冇興趣去深究。就好似之前炒奧運概念股，一日未開幕，都有得玩，體育股一路升。
上海迪士尼仲有一年先開幕，冇人夠膽話佢第日會好似香港咁唔掂。再加埋自貿區概念，成個上海概念仲可以玩足成年。
李可強