自歐洲金球獎與世界足球先生合併後，國際足協的「最佳XX選舉」經常出現超低能、勁搞笑結果，如不入2014世盃最佳11人的美斯，卻成為當屆「最佳球員」。最新力作，屬將皇家馬德里門將卡斯拿斯（圖）列入候選「2014年度最佳11人」之中。
先看看卡斯拿斯今年做過乜：上半年在皇馬西甲被雪；世盃則錯漏百出，西班牙亦在分組賽出局。如此表現，縱使本季初重返正選，也不足以入選年度最佳門將最後5強吧？箇中原因會否是咁的：因球迷可參加競猜最佳11人遊戲，估中晒可獲抽大獎機會，就好似電視台送禮問答遊戲，主持都會故意給些必錯的答案讓參賽者易揀啲；可能國際足協用心良苦，加埋卡斯拿斯，就係想球迷揀少個？
很多事情表面上合情合理，但諗深一層便知有問題。如這「年度最佳11人」是由約20,000位職業球員選出，同行選同行，驟耳一聽好合理吧？
同行選同行未必合適
如果英超球員選英超最佳，由於全季會對晒19支對手，理論上各球員對其他對手都會有一定認識，當然合理；但這些全季主要在一個國家訓練及比賽的球員，對其他地區如德甲、意甲、甚至南美自由盃等又會有多少認識？各地足球記者、球評家甚至球迷，看來才是選「年度最佳11人」的最佳人選。不過香港人對這種荒謬應已習以為常，我們的特首一樣都不是由「最佳人選」──700萬港人去選啦！
方柏翹
now足球評述員