76人周一主場又輸畀拓荒者，開季已經14連敗，而分析美國體育博彩嘅網站就話，76人餘下賽事都會係被睇淡一方，最大機會贏波，已經數到下年3月主場對湖人。
76人經過管理層不留情面咁大換血，今季只靠兩位一、二年生路維同卡達威廉士孭飛，網民已經笑佢哋實力不如發展聯盟球隊，連NCAA球隊肯塔基教練都抽水，話對76人有信心贏波。就算幾乎被全國球迷睇死，76人依然故我，周一主場就以104:114不敵拓荒者，連輸第14場；不過賭波盤路都唔衰得晒，76人呢場受讓12.5分，都叫輸波贏盤。
博彩網站numberfire.com就分析，76人今季餘下比賽贏波機會率都唔會上到5成，即使被莊家睇死要受讓，最高勝率預期會係明年3月30日主場對湖人，取勝率有44.6%。堂堂NBA歷來總冠軍第2高球隊，竟然被視為最有機會成76人贏波對家。湖人今季繼續受傷兵問題困擾，尼殊同蘭度爾已經因傷提早收「咧」，𠵱家連打得吓嘅前鋒沙維亞亨利，都因為阿基利斯腱傷而收「咧」。
識睇，一定係睇足英台【英波Live】：
http://soccer.appledaily.com
http://bit.ly/engballlive