內地大鑼大鼓推動嘅智慧城市，商機講緊係四萬億元人仔，主打智能電錶、數據採集以及解決方案嘅威勝集團（3393），正正食正呢條大水喉，錢途極限。
旗下客戶粒粒皆星
威勝主打兩瓣業務——智能計量業務（AMI）以及智能配用電業務（ADO），前者主要透過智能電錶，收集用戶數據，後者則透過數據分析，更有效控制電力分配，簡單啲講，大數據同環保兩個最強概念有齊！威勝於AMI已屬龍頭之一，市佔率達一成，後者雖說在起步階段，但中期分部溢利大升逾70倍，絕對係未來增長引擎。旗下客戶粒粒皆星，包括國家電網、南方電網、華能、大唐、中石油、北京地鐵等，新近更與西門子合作，對引進新技術幫助極大。
翻查股權披露，大股東揸54.5%，但睇牌路威勝相當乾身。根據線人所講，原來好多基金持貨低於5%，擺明「有好嘢自己收埋」，假設全部揸3%，十間計已經講緊三成股權，連埋大股東手貨，街貨僅1億股，貨源盡落強者手。
講估值，威勝預測市盈率13.5倍，A股同業林洋（601222）19.8倍，誰平誰貴一目了然，上市後年年派息，屬中線坐貨佳品，用摩通目標價10.5元計，潛在升幅26%。
唐牛
https://www.facebook.com/tongcow88