因為講咗一句「請梁振英考慮辭職」而被中央「炒魷」、冇得做全國政協職務的自由黨田北俊，雖然連黨魁都辭埋，但其實自由黨永遠都係當佢係精神領袖，自由黨青年團今日嘅Social Wednesday就邀請咗田少做嘉賓，聽自由黨青年團主席李梓敬講，Social Wednesday搞咗咁多次，今次報名嘅人最多，有逾200人話會出席，一睹田少嘅霸氣。
為咗唔好令出席嘅人失望，李梓敬喺facebook話，田少預告今晚爆大鑊：「田北俊議員將會破天荒真正暢所欲言，將呢段時間嘅心路歷程，同埋對特首嘅睇法，最坦誠咁同大家分享！所謂肥水不流別人田，佢之前hold住冇同任何傳媒講過嘅嘢，到時將會喺我哋自己主場嗰度大爆料。」