故事由真人真事改篇：
在一個月黑風高嘅晚上，於80年代尾銅鑼灣一間豬肉檔前，我呢一個風流倜儻，英俊不凡，簡單來講，就係「很劉華」嘅年青小伙子，雖然面對著六、七個彪形大漢，加多個肥叔父，但我唔驚！因為我要保護我身後的女人。
「你放過呀怡啦，佢唔會鍾意你架。」冇錯，我係同阿怡發展梗，雖然未追到手，但我好肯定，呢個依家企喺我後面嘅女人，會跟我一世嘅。至於對面呢個肥頭耷耳，咪睇佢個樣成四張幾野咁，其實佢30歲都未到。不過佢好彩，含住金鎖匙出世，喺我隔離呢間豬肉檔舖位，就係阿怡屋企同佢租。
「你唔好以為我唔知你離間梗我哋。我每日落黎呢個舖位時，佢都放低手上嘅功課，含情脈脈咁望住我，佢一定係對我好有意思。阿怡，你講…」阿怡偷望佢？哼！除非阿怡想扣喉減肥，否認冇可能！
「占士，你誤會啦…」阿怡把聲，就算聽得出係好驚慌，但都係不失溫柔，難怪肥頭耷耳咁著迷嘅。
「我誤會？上次明明係你捉住我隻手！」
「冇呀…占士」
「我知啦，你一定係俾呢個男人落迷藥。阿怡，我同你先係最夾，你瘦我肥；你靚我醜；你屋企賣豬肉，我屋企賣鹹魚，你同我一齊，我地可以晚晚煮鹹魚蒸肉餅…」
雖然我欣賞佢有自知之明，知自己又肥又醜，不過追女仔竟然用「鹹魚蒸肉餅」做Selling point，咁新穎嘅招數，真係恕我唔識欣賞，呢個時候，佢伸出佢的隻肥手，用一把Chok聲講，「阿怡，跟我走，我會俾到幸福你。」
幸福？跟你呢個肥頭耷耳會有幸福？仲想拉走我嘅阿怡，唔使指意！然後我諗都冇諗，一拳打過去！結果好明顯，我雖然風流倜儻，英俊不凡，不過我睇得唔打得，我好清楚，我當時被人拳．打．腳．踢。我覺得我個頭，我個嘴，我個鼻都流梗血…
在混亂之際，我聽到阿怡不斷高呼「停手」（冇錯，的確是那好老土的場口，咁80年代係咁架啦！），然後阿怡大叫一句：「占士！我知！我知你可以俾到幸福我！」唔係呀嘛，阿怡唔會為咗我真係同呢隻肥頭耷耳一齊呀嘛，呢個Moment，用返近代嘅歌去表達的話，就係：「心…突然的隱隱痛…Huhu…」
「阿怡，你終於認你喜歡我啦。」
「占士，我唔喜歡你。」阿怡呢一句，語帶肯定，終於令我個心定啲，佢繼續，「我喜歡嘅只係阿邦，但你都可以俾到幸福我，就係唔好纏住我。」
聽到呢一句，佢望住阿怡，再望一望我，沉默咗最少20秒，正當我以為肥頭耷耳會惱羞成怒時，佢轉身，然後同佢啲手下，好冷靜咁講咗一句，「呢間舖俾呢個男人啲血整污糟晒，盡快同我是但搵個買家賣咗佢。」然後佢嘅身影消失於我地眼前
＊＊
今日，我同我老婆，即係阿怡，喺同一條街望住同一個舖位。以前嘅豬肉檔，今日已經變成表舖。
「老婆，諗落當年我俾隻肥頭耷耳打都抵，如果唔係，我唔會流到一地升，而佢又唔會肯放個舖出來。」阿怡廿年後今日，都仲係咁靚。「不過最叻都係你，識叫我即刻買佢間舖，你又點會諗到羅素街呢廿年變得咁快，仲係全球最貴鋪租嗰條街，電車站變時代廣場，以前賣豬肉，現在賣珠寶，呎租近1800蚊。」
「老公…其實你唔係真係以為，所有野都係咁岩得咁橋呀嘛？」望住佢嘅表情，我知我應該有啲野係應該知而又未知，「你咩意思？」
「總之就所有成功男人背後，都有一個有計劃的女人。幸福，係要自己爭取嘅。」佢呢個答案，充滿說不出的詭異，但，我唔敢追問。
然後我諗起，隻肥頭耷耳講過：
「我每日落黎呢個舖位時，佢都放低手上嘅功課，含情脈脈咁望住我，佢一定係對我好有意思。」「我誤會？上次明明係你捉住我隻手！」
by千頌C@堆填區
http://fb.com/winbigwok