印刷電路板生產商恩達（1480）今招股，呢間公司做咗25年，屬家族式經營嘅公司，話事人係創辦人陳榮賢與太太陳勇兩公婆，本來都冇乜睇頭。噚日招股記者會嘅唯一亮點，應該係35歲嘅太子爺陳恩永，佢喺上市公司太子爺當中都算係青靚白淨、俊朗嗰款，驟眼睇某啲角度，佢都有些少似藝人鄭嘉穎，不過再望多眼，就似番佢自己嘞。
呢間恩達真係家族式經營，四位執行董事就係陳氏兩夫婦，同埋佢哋一對公子。大公子陳恩光喺香港讀圖像設計出身，負責廠房擴張同埋人力資源，二公子陳恩永就係倫敦大學管理學畢業生，主要負責市場推廣。
噚日大公子冇現身，二公子陳恩永首次見傳媒，表現青澀，但佢都盡量代爸爸答晒所有傳媒問題，會後佢都冇話即刻閃，肯留多陣應付傳媒，算係咁喇。