政制及內地事務局為推廣基本法，去到好盡，連轉珠Game都要出。隻Game叫「精靈基本法」，日前上架，個App本身有《基本法》電子書、政府新聞公報、宣傳短片等，但醉翁之意在轉珠，既然用公帑製作嘅，當然要立即試玩，玩落發現，雖然是一隻疑似神抄轉珠遊戲，但見唔少設計都幾有心思，每入一關前，要先回答基本法問題unlock，unlock後用自己選擇的角色，然後靠轉珠擊倒對手，儲滿氣還可以出絕招，不過，出招前一樣要答基本法問題，玩完一陣，真係會學到嘢。
初頭玩家有「蛋撻」、「魚蛋」等角色選擇，而不同角色有不同戰鬥力，慢慢儲滿寶石，就可以扭蛋扭出新角色，圖鑒上有共150個角色，例如「臭豆腐」、「格仔餅」、「端午節糉」，都好有香港特式，相當抵讚。不過，每次抽角色要5000粒寶石，完成一關卻只有約50粒寶石進帳，無得課金，幾時先儲得齊呢？