雖然利物浦今季成績低迷，但有樣嘢值得一讚，佢哋真係好錫球迷！英國《每日鏡報》做咗個測試，寄信畀每支英超球隊嘅3大球星，睇吓佢哋會唔會回信，而紅軍嘅回信率係百分之一百！
《每日鏡報》喺兩個月前，分別寫信畀謝拉特、巴洛迪利同史杜列治，寄去晏菲路球場，而3位利物浦球星都肯百忙中回番張簽名相，相當有心！喺英超20支球隊入面，淨係得紅軍同愛華頓兩支默西賽德郡球隊嘅回信率係百分百；而愛華頓嘅效率仲好高，《每日鏡報》最快收到嘅簽名回信就係盧卡古、巴尼斯同侯活。曼聯同阿仙奴都算唔錯，寄畀3個球員之中，兩個有回音。
曼城3子冇個覆
紅魔方面，朗尼同尹佩斯有回信，得迪馬利亞冇覆；而兵工廠嘅韋舒亞同奧斯爾都有覆，新加盟嘅韋碧克就冇。至於車路士就得泰利一個覆，迪亞高哥斯達同法比加斯都冇。幾支強隊中，曼城就最衰，寄畀阿古路、耶耶托尼同高柏尼嗰3封都石沉大海。
巴神離群隊友不滿
利物浦對球迷好，但好心唔一定有好報，隊波成績唔單止差，仲盛傳隊內氣氛麻麻，將帥不和。上星期六晚，全隊利物浦都喺倫敦集宿，準備周日英超作客水晶宮，但巴洛迪利就自己走咗去睇拳擊。雖然巴神受傷，場波唔使預佢，呢晚做乜都得，但班隊友就唔太鍾意囉，覺得巴神唔夠團結。
英國《每日郵報》仲爆，隊長謝拉特、佐敦軒達臣、史達寧同菲臘比古天奴都唔滿意上場歐聯作客皇家馬德里做後備，而且見到球隊咁嘅環境，史達寧都未肯落筆續約住。雖然紅軍內外交困，創22年最差開季紀錄，但英國《太陽報》透露，領隊羅渣士仲得到班主約翰亨利嘅支持。約翰亨利好欣賞羅渣士喺輸畀水晶宮後將責任攬上身，而唔係卸畀啲球員。
識睇，一定係睇足英台【英波Live】：
http://soccer.appledaily.com
http://bit.ly/engballlive