孫柏文真係感覺有少少意外，上周五人民銀行突襲式減息，啲土共、藍絲帶冇話明益香港人又送大禮。原來佢哋抽水都有底線，真係估唔到。點都好，大陸信貸市場亂過亂葬崗。大家都知啲借到錢嘅人，其實有冇心最終還錢係個大問號。最終嘅意思係借錢返來，做啲有效率嘅投資，例如起廠房生產啲有需求嘅嘢，賺到錢就攞嚟還，而唔係當啲債到期時，求其再借啲新錢還舊債。呢種新債冚舊債，最終會爆煲，而到時就睇吓額度幾大。
內地股民驚變點心
因為用返2008年嗰句，1,000萬元還唔到就係債仔嘅問題，10億元還唔到就係銀行嘅問題，1,000億元還唔到就係央行嘅問題，減息百分之零點幾真係唔知有冇用。再講，今日將2008年嗰句再伸延，就係幾十萬億元還唔到就係貨幣大貶值嘅問題，唔信問吓嗰啲做冇幾個月就會酗酒嘅日本財長們。
滬港通通咗個幾禮拜，港股繼續屁都唔響個，今日我都要認錯。之前我不斷話如果大陸冇資訊自由，滬港通會被嗌停，因為內地同胞一但因知嘢比我哋少同慢而輸錢，會喺浦東暴動。點知原來我低咗估啲內地同胞，佢哋唔會暴動，因為來都唔來，又點會輸錢？而唔來嘅原因，就係佢哋知到自己啲訊息資料唔可靠，會被當點心咁食，就直情唔來。
訊息唔可靠，亦可解釋香港股民對大陸股民一個疑惑。就係點解大陸人唔睇基本因素，咁鍾意睇埋啲乜走勢圖、技術分析。我哋就仲估佢哋唔識資本主義，唔識畢菲特嘅價值投資法，甚至覺得佢哋係癲。其實根本係絕對理性，因為當差不多所有訊息資料都係唔可靠係假，唯一冇得假嘅訊息就係價錢。而單靠價錢轉動去分析，就係技術分析。連我呢個番書仔都開始認識祖國了！點都好，息真係減咗，滬港通又開咗車。大市我係悲觀，但就繼續睇好中移動（941）呢啲4G概念，亂局下一邊買恒指put，一邊買中移call吧。
孫柏文
獨立股評人
http://facebook.com/shuen
本欄逢周二刊出