昨日在北京舉行的向華勝告別式，至親到場送他最後一程，其七哥向華波因行動不便，所以由妻女代為出席，向華波昨接受電話訪問說：「等佢哋返嚟香港再搞我先去送佢。」
向華波大談弟弟傳奇一生，他說：「細佬好有威嚴，但對女人就會放軟，當年佢拍完《賭神》，事業正處高峯期，華勝去卡拉OK，有女人入嚟叫佢一聲『勝哥』，佢就冧到喺袋拎五萬蚊送畀女仔，一連三個入嚟，都臉不改容逐個派錢，佢仲畀張無限額嘅信用卡我任碌，一直都好照顧我，過年仲會畀幾萬蚊我派利是。」向華波表示向華勝患病前，計劃在內地大展拳腳搞生意，偏偏卻被癌魔帶走，他說：「可能細佬生前為生意應酬太辛苦，一日五包煙，飲兩支半白酒，唔知佢係咪咁樣捱出病嚟？」他同時又大讚弟婦端木櫻子：「佢好能幹，又有生意頭腦，好識照顧自己，唔使為佢擔心。」
採訪：鍾國仁