今年6月鄺佐輝證實患上第四期腸癌，接受腸道微創手術後，又發現癌細胞擴散至肝臟，9月中再接受切肝手術。雖然難關重重，鄺佐輝捱過兩次大手術後，再接受8次化療，身體狀況漸見起色，前晚他抖擻精神，現身九展舉行的「中華才藝小姐」初賽。
明年完成化療
前晚鄺佐輝現身時笑容燦爛，表示原定為大會擔任指導工作，可惜帶病在身，未能勝任。如今康復情況良好，專程到現場支持，談到治療腸癌的最新進展，他說：「𠵱家進行緊化療，之前第一個星期好攰好辛苦，第二個星期就精神番，一共要8次化療，𠵱家做咗6次，抱住樂觀心態，預計3月會完，到時會休息一個月，再重投工作，之前同王維基有合作，有兩年合約，𠵱家完咗。原本喺深圳香港衞視有個節目，但就因為有病而暫停，嗰邊仲話幾時返去都得。」
鄺佐輝發現腸癌的同時，剛剛約滿港視，手停口停，又身患惡疾，情況令人擔憂，如今已經雨過天晴，他說：「從來未試過失業，都有擔心呢個問題，但上天對我好好，之後都好順利，有保險，朋友都有幫手，慳慳哋都冇問題。不過工作就停咗，𠵱家做一兩個鐘都好攰，大家都要注意身體。」
不忘宣傳港視
雖然約滿港視，鄺佐輝仍然為王維基打氣，更加不忘為劇集宣傳，他說：「好為王生開心，可以同大家見面，嚟緊有幾套劇都有我份。」
採訪、攝影：卓寶花