上周一網上傳出，國美電器（493）創始人黃光裕可能提前出獄，對於呢單傳聞，香港內地股市反應好唔同。
國美當日股價高開2.5%就無以為繼，由於國美高層不斷否認，股價至昨日只升0.8%。
黃光裕喺大陸隻殼股中關村就越升越有，上周一升停後，之後仲不斷升，一個禮拜已經升超過22%。同一單新聞，咁大差別，證明A股仲係消息市為主，亦係一個好機會俾香港股民學下，內地莊家用消息將股價舞上舞落嘅手法，呢樣嘢，恐怕好快就成為香港股壇必備生存技能。
黃光裕喺2010年因操縱股市被判監14年，刑期要到2022年。按內地法律，要減刑至少要坐一半監，最快要到2016年才可出冊。所以近期內提前出獄機會好微。
單嘢由網上傳出，冇任何消息來源。傳下傳下，就不斷加鹽加醋，話黃光裕當年係俾前政法書記周永康批捕，涉及一大班已經下馬嘅政要，有機會平反云云。
由於夠晒神秘，仲俾唔少內地傳媒轉載，但所有消息都唔知邊度嚟，恐怕是有心人放料。國美股價冇反應，說明香港股民唔受落，但大陸股民就好buy。
李可強