文仙尼（右）回歸執教國際米蘭，第1場波就係米蘭打吡戰，喺周日以作客身份出戰AC米蘭，結果靠祖爾奧比喺下半場建功扳平，踢成1:1平手，算係唔錯嘅頭炮成績。
文仙尼返嚟國米，排陣上先廢咗上任教練馬沙利嘅3-5-2陣式，打返4個後衞，唔少球員賽後都大為讚好。文帥賽後話：「和波我都好開心，咁耐冇返嚟，不變嘅係米蘭打吡要贏波一啲都唔容易。我仲要時間去了解吓陣中嘅球員，踢番4後衞陣式仲需要時間適應。」
另一邊廂A米已經連續5場聯賽贏唔到，令人失望嘅係前鋒費蘭度托利斯又做隱形人，正選上陣冇波入冇射門。費托一心諗住嚟意甲重振聲威，打吡戰前仲話想做意甲神射手，睇番佢自從第一場上陣入波後，到𠵱家連續8場都食白果，要做神射手好似難啲喎。
識睇，一定係睇足英台【英波Live】：
http://soccer.appledaily.com
http://bit.ly/engballlive