無綫新聞部，又有老將離巢咯！有體育新聞王子稱號嘅無綫體育主播伍家謙噚日喺facebook透露，下月初會離開做咗11年多嘅無綫新聞部。喺無綫秋後算賬員工之時離職，難免會引起各方猜想，伍家謙強調今次辭職「純粹是希望自己在事業上有些轉變」。
「體育新聞壓縮再壓縮」
珠海學院新聞系畢業嘅伍家謙，03年加入無綫，報道風格同已故體育主播伍晃榮一樣咁輕鬆有趣，試過有觀眾誤以為兩人係兩父子㖭。伍家謙坦言，體育記者呢份工令佢可以到世界各地採訪，仲同著名運動員近距離接觸，而無綫新聞部削減體育新聞時段，係新聞工作生涯上嘅「遺憾」：「體育新聞往往成為被裁的第一選擇，播出時間壓縮再壓縮」。無綫新聞喺早前決定取消逢周一至五「六點半新聞報道」嘅體育新聞環節。八方聽聞伍家謙離職後會以自由身「接job搵真銀」，佢亦明言離巢後「當然仍會在體育界努力，我想我一生都離不開體育」。周五晚11點無綫晚間新聞，將會係佢最後一次擔任無綫新聞體育新聞主播。