賣走頭號球星後，點先可以保持實力？熱刺上季已經證明，買一大堆中價貨返嚟係冇用，但今季利物浦唔信邪，用賣走蘇亞雷斯筆錢狂簽人，喺修咸頓撬走咗3個主力，點知結果真諷刺，修咸頓排緊第2，而利物浦就排12！羅渣士，呢隻鑊你走唔甩㗎嘞。
負水晶宮無奈認衰
利物浦星期日作客水晶宮，原本有個好開始，拉爾拉拿助攻，列基林拔入波，兩位修頓舊將攜手合作，幫紅軍兩分鐘就領先1:0。點知歡樂嘅時光過得特別快，𠵱家利迷都想同羅渣士講bye bye。17分鐘，杜韋加爾執雞射入，半場為水晶宮追成1:1。換邊後，羅渣士換咗波連尼同安利簡恩入嚟，諗住加強攻力，點知反而被水晶宮嘅列特利同積甸拿克連入兩球，反輸1:3完場，各項賽事4連敗！喺尾段，仲影到後備門將巴利鍾斯閤埋眼瞓覺，可能佢都冇眼睇。
洛夫雲大跌watt，巴洛迪利入球荒，格連莊臣又唔穩陣，謝拉特踢防中更加係形同虛設；要數紅軍班罪人，真係10隻手指都數唔晒，但講到尾，要負全責嘅都係羅渣士。今季利物浦有阿蘇離隊，佢揸住成億鎊買人，挖咗上季喺修頓踢得好好嘅拉爾拉拿、林拔同埋洛夫雲，但班新兵冇個擔到大旗。由傳媒到球迷都狂寸羅帥，佢買咗人哋3大主力，但「聖徒」排緊第2，利物浦就淪落到第12。
羅渣士賽後認衰，「完全係領隊嘅責任，係我決定陣容同戰術。我哋覺得好失望，但一定要盡快重回正軌。」羅渣士，留畀你嘅時間唔多㗎嘞，唔少球迷都喺網上討論緊，邊個頂你個位最好；賓尼迪斯回歸，更係越傳越熱！
巴神唔知醜辣火頭
喺球隊全面受靶嘅時候，今場缺陣嘅巴洛迪利喺訪問度撩起紅軍球迷把火，「如果10分最高，我會畀自己今季7分，我𠵱家嘅跑動更多，更積極。」喺聯賽一球都未入過都夠膽畀自己7分咁多，我求大俠想問聲，巴神，你係咪轉咗踢後衞？
識睇，一定係睇足英台【英波Live】：
http://soccer.appledaily.com
http://bit.ly/engballlive