不時喺佔鐘區留守嘅壹傳媒主席黎智英，近日被指喺帳篷內密會江湖人物「刀疤剛」，被傳媒連日以頭版狙擊，話佢同黑勢力勾結。肥佬黎噚日大呻，其實同刀疤剛只屬萍水相逢，有人嚟到帳篷，支持民主咪傾兩句，同對方一啲都唔熟。
留守者認得 曾食催淚彈
肥佬黎噚日朝早約10點零，再去到佔鐘區留守。只見肥佬黎一去到坐開嘅帳篷，即場向佔中義工大呻，話自己好慘，連續兩日被傳媒用頭版寫佢勾結黑勢力，實際根本唔係呢回事。究竟佢哋點相識？八方問過肥佬黎，佢話喺佔領期間，經白鴿黨單仲偕而識，既然大家都係佔領者，嚟到傾多兩句又何妨？一向佢個帳篷，都對民主同路人來者不拒。
單仲偕向八方透露，人稱「刀疤剛」嘅男子係東區街坊，嚟過佢地區辦事處就地區問題投訴，喺佔領區見到佢咪嗲兩句，仲話畀肥佬黎聽係東區街坊，但其實連對方個名都冇正式介紹過畀肥佬黎，而佢冇諗過亦唔知對方乜背景！
有佔鐘區留守者就認得，「刀疤剛」係堅實佔領者，9.28有份食催淚彈，有時會喺佔鐘區嘅帳篷過夜，從來冇見佢運物資嚟、亦冇𡃁跟住出入，但自爆曾經坐過監。據知被傳媒話佢同肥佬黎過從甚密後，「刀疤剛」都有同人講，為香港，為民主，怕乜呀？表明堅持留守。有畫家就幫佢畫咗幅畫，放喺佔領區成為新景點。
李八方
mailto:[email protected]
