海港城嘅海運大廈露天廣場，噚晚掌聲同歡呼聲不絕，原來海港城今年會喺12月11、18同23日，喺該處上演名為《聖誕星城》嘅本地原創聖誕歌舞劇，相信係香港商場嘅零的突破，噚日則舉行傳媒預演。
查實呢個劇目係由一班本地製作人同表演者策劃，以「聖誕列車的愛情故事」為題，男女主角會喺現場佈置成紅、白、金色嘅聖誕火車站、加上一列長30米、佈滿星星嘅聖誕火車上，即場獻唱醉人樂曲，聖誕老人、魔術師、雜技人同舞蹈員則會有精采舞蹈表演。
原來聖誕火車嘅巨型蒸汽火車頭，煙囱會噴出無數星星㗎，夜晚仲會配合燈光，營造浪漫感覺，大家只要捐$20畀「香港血癌基金」，就可以登上「聖誕火車」，通過火車頭嘅星光隧道，同3米高嘅雪人、熊仔同聖誕球影相。