恒生銀行（011）公關阿頭張樹槐（水哥）最近轉戰內地，唔係講緊銀行業務，而係佢最擅長嘅馬拉松賽跑。佢前日同恒生中國一班同事參加廣州馬拉松，完成佢喺內地第10個全馬。
水哥5年前發起舉辦「恒生慈善跑」，前日去廣州參加馬拉松，就係慈善跑嘅廣州站，佢同恒生中國行政人員楊子江一齊參加，仲有副行長、廣州分行行長，加埋20幾位恒生員工參加。水哥早前喺電台講過，就係呢位楊子江鼓勵佢跑步，對方教佢跑步技巧，借埋好多關於馬拉松嘅書籍畀佢研究，估唔到兩人今次仲一齊跑，可以切磋心得。
恒生慈善跑今年已經喺北京、上海、廣州站舉行，深圳煞科嗰場將會喺下月7號舉行，會幫內地西部貧困兒童籌款買對波鞋，等細路仔可以享受運動嘅樂趣。慈善跑舉辦5年以來，已經有500多位同事參加，至今籌得50萬元人民幣。